Mat 14 | DOB | STEP | Tuta gote 'enaya Elodi, tauna Galili 'ana toloina, Yesu 'ina guinuwa alena 'inonona,

Matthew 14

Yoni togiebapitaiso 'ina mwawasa

(Maki 6:14-29; Luke 9:7-9)

1 Tuta gote 'enaya Elodi, tauna Galili 'ana toloina, Yesu 'ina guinuwa alena 'inonona, 2 ga 'ina toguinuwao 'ieonedi, 'igwae, “Nate tai nina tauna Yoni togiebapitaiso, ni'atu 'aene mwawasega 'itoolo limana ga 'enega ma ina waiwai 'iguiguinuwa.”

3 Manuna lowa Elodi Yoni 'igiyaina ga 'iyonina ta deliya 'isa'una. Ta Yoni 'ana giyai 'alena nate 'ebweu waine 'ana esana Elodiasa, nate Elodi tasina Pilipi mwanena, 4 ta Elodi 'iagina ga 'iaina, ta Yoni Elodi 'ieonena, 'igwae, “Gote nigeya bubuna bobo'ana manuna tasiyo mwanena 'uaina.” 5 Nate 'alena 'enega Elodi nuwanuwana be Yoni 'iloemwawasi, ta esi tomota yaudi Yoni si'awa palopitaena, 'enega Elodi 'imatauta ga nigeya Yoni 'iloeloemwawasi.

6 Muliyega Elodi 'ina 'asiyata tubuwa 'ana 'ebe nuwa'i'ita sagalina 'enaya boda siegogona, ga Elodiasa natuna mewainena boda matadiya 'ilausa ga Elodi 'igiegwausowalina. 7 'Enega Elodi gomagweine nina 'ena 'iona oboboma be 'aene 'abo to'ase nuwanuwana 'ida 'ebwa'e tuga, ta wate 'isawa tamatamana. 8 'Enega sinana 'iona gomagweine 'enaya ga 'enega gomagweine nina Elodi 'ieonena, 'igwae, “Nuwanuwagu Yoni togiebapitaiso bulubuluna gaeba 'enaya 'usa'u be 'u'ebwa'egu.”

9 'Enega Elodi 'inuwamwau sinabwana, ta tuwa tuga 'ina sawatamatamana 'inuwa'i'isina, ta boda ni'atu 'ina ona sinonona, 'enega 'itagwala, 10 ta 'ina toguinuwao deliya 'ietunedi, ga Yoni 'otona si'upwena, 11 ta bulubuluna gaebaya siusena ga sime'ena, ga gomagweine si'ebwa'ena. Ta gomagweine nina 'i'ewena ga 'itauyena sinana 'enaya. 12 Ta Yoni 'ana tomuliyao simai ga Yoni kokowana si'ewena, ga sisa'u 'ali'aliyena, ta muliyega sitauya Yesu 'ena, ga yage gete sisimanena.

Pwalu sinabwana Yesu 'ie'enidi

(Maki 6:30-44; Luke 9:10-17; Yoni 6:1-14)

13 Ta Yesu yage gete 'inonona, 'enega 'iapwesa ga waga 'igeluna ga 'itauya sena mwatui daitaya. Ta boda Yesu 'ina tauya alena sinonona, 'enega 'idi 'asa 'ediyega siapwesa ga 'edega sitauya Yesu 'enaya.

14 Ta tuta nina Yesu wagega 'isuya dabalaya pwalu sinabwana 'i'itedi, ga 'ina nuwa'ole'oleyega tole'oasao 'igiebobo'anedi.

15 Ta 'asuinuwanuwaya 'ina tononoyao simai ga Yesu sieonena, sigwae, “'Inapwana, sena gete mwatui daita ta 'iabe 'iguguyoi. 'Enega boda getedi 'uda etunedi be sida ila, be 'adi masula sida gimwane 'asa selabediya 'ediya.”

16 Ta Yesu 'igwae, “Geya'abo sitautauya, ta 'omi esi masula wa'ebwa'edi be si'a'a.”

17 'Enega sigwae, “Ya! 'Ama masula nigeya yauna, nate namo beledi nima ta iyana 'eluwa.”

18 Ta Yesu 'igwae, “Beledi be iyana nidi wa'ebwa'egu.”

19 'Enega pwalu 'iloinedi ga pwatulaya simiyatowa, ga beledi nima ta iyana 'eluwa 'i'ewedi, ta 'i'itatu'e galewaya, ga masula nidi manudi 'iona oboboma, ga muliyega beledi 'igitomwedi, ga 'ina tononoyao 'i'ebwa'edi ga taudi tomota 'ediya sieguyaiyedi. 20 'Enega maibo'adi si'ai ga gamwadi 'ipawa, ta masula tupwatupwadi siegogonedi, ga kodo tuwelo siloemaedi. 21 To'e'ai nidi tai dimo 'adi yau paibi tausani nadigega, ta wate iine be gogama yaudi nigeya sisawasawadi.

Yesu ola debanega 'itauya

(Maki 6:45-52; Yoni 6:15-21)

22 'Enega 'ina tononoyao 'iloinedi be wagaya sigelu be 'aene sinugana mali esenaya, ta tauna 'aene tomota maibo'adi 'iemataluwedi be siila 'idi 'asaya. 23 'Enega sigelu, ta Yesu pwalu 'ietunediya, ta muliyega tauna tebweuna 'oyaya 'itu'e sabi sidasida Yaubada 'ena. 'Enega ni'atu 'iboi, ta Yesu tebweuna namo 'imiyami.

24 Ta tonono nidi 'idi waga ni'atu sineyena ga sidolo bwagabwagaya, ga lisu sinabwana silobena ga 'idi waga 'ilobunibuni, ta wate yagila matadiyega 'imeema.

25 Ta tomwa uliulitaya Yesu ola debanega 'itauyama, ga 'ina tononoyao nidi selabediya 'iapwesa. 26 Gote 'ena 'ina tononoyao Yesu si'itena ola debanega 'imeemai, ga simatauta sinabwana, 'enega sinanala, 'idi nuwanuwa 'aene welabana si'itena.

27 Ta Yesu 'ieonedi, “Geya'abo wamatamatauta. 'Abo'agu tuga, 'imi 'inapwana.”

28 'Enega Pita 'iona, 'igwae, “'Inapwana, 'eguma ona'ai'aila 'oyo, 'ueonagu be ola debanega yawawa 'emuya.”

29 Ta Yesu 'igwae, “'Umai.”

'Enega Pita wagega 'imwa'uta ga ola debanaya 'itautauya Yesu 'enaya. 30 Tuta nina 'itautauya yagila sinabwana 'i'itena, ga 'imatauta, ta olaya 'idalala, ga 'ibwau, “'Inapwana, 'ulemegu!” 31 Ta Yesu 'ilomanini ga Pita 'igiyaina ta 'igwae, “Toemisa gidaliyo, to'ase manuna 'uenuwanaluwa?” 32 'Enega siteluwa wagaya sigelu, ta yagila 'ipela.

33 Ga taudi waga 'ana tomiyanao sibwagobwago Yesu 'ena, ta sigwae, “Ona'ai'aila, 'oyo Yaubada Natuna.”

Tole'oasao 'igiebobo'anedi sena Genesaleta 'ena

(Maki 6:55-56)

34 'Enega siabala sena Genesaleta 'enaya ga sisuya dabalaya. 35 Ta sena nina 'ana tomiyanao Yesu si'inanena, 'enega ale silelewanena 'idi 'asa maibo'ana 'ediya ga 'idi tole'oasao maibo'adi sime'edi Yesu 'enaya, 36 ta sisidena, sigwae, “'Inapwana, kapekapeyana be tole'oasao getedi 'amu 'oama tupitupinamo sida gitoo?” Ga Yesu 'itagwala. 'Enega taudi 'ana 'oama sigitoona sibobo'ana.